അജിത് ടോം
ഏതാണ്ട് ആറ് വര്‍ഷം പിന്നോട്ട് ഒന്നു സഞ്ചരിക്കാം. ഇന്നു നിരത്തില്‍ കാണുന്ന സ്‌റ്റൈലിഷ് കാറുകളെല്ലാം സജീവമായി വരുന്ന സമയം. അന്നു കണ്ടിട്ടുള്ളതും കേട്ടിട്ടുള്ളതും മൂന്നു വിഭാഗം കാറുകളെക്കുറിച്ചാണ്. ഹാച്ച്ബാക്ക്, സെഡാന്‍, എസ്യുവി. ഇതിനിടെ മറ്റൊരു സെഗ്മെന്റ് വാഹനപ്രേമികളുടെ സങ്കല്പത്തില്‍ പോലും ഉണ്ടായിട്ടില്ല. ആ അവസരത്തിലാണ് കോംപാക്ട് എസ്യുവി എന്നു സ്വന്തമായി ഒരു വിഭാഗംതന്നെ സൃഷ്ടിച്ച് റെനോയില്‍നിന്നു ഡസ്റ്റര്‍ ജനിക്കുന്നത്. ഇന്ത്യയിലെ റോഡുകളെയും ഓഫ് റോഡുകളെയും ഒരുപോലെ കീഴടക്കത്തക്ക കരുത്തുമായാണ് ഡസ്റ്റര്‍ എത്തിയത്. ഒരു യാത്രാ കാര്‍ എന്നതിലുപരി ഓഫ് റോഡുകളെ കീഴടക്കാനുള്ള കരുത്തും പകര്‍ന്ന് പുറത്തുവന്നിരിക്കുന്ന റെനോ ഡസ്റ്റര്‍ അഡ്വഞ്ചറിന്റെ ടെസ്റ്റ് െ്രെഡവ് വിശേഷങ്ങളിലേക്ക്…
ആദ്യം പുറത്തിറക്കിയ ഡസ്റ്ററിന്റെ പരുക്കന്‍ ഭാവങ്ങളെല്ലാം പരിഹരിച്ച് എഎംടി ടെക്‌നോളജിയുള്‍പ്പെടെ ഡസ്റ്റര്‍ പുനര്‍ജനിച്ചിരുന്നു. അതിനു പിന്നാലെയാണ് സാഹസികതയ്ക്കിണങ്ങുന്ന രീതിയിലുള്ള ഭാവപകര്‍ച്ചയോടെ ഡസ്റ്ററിന്റെ അഡ്വഞ്ചര്‍ എഡിഷന്‍ പുറത്തിറങ്ങുന്നത്.
എക്‌സ്ടീരിയര്‍: ടൈപ്പ് ടു ഡസ്റ്ററിന്റെ എക്‌സ്ടീരിയറില്‍നിന്നു നേരിയ മാറ്റങ്ങളോടെയാണ് അഡ്വഞ്ചര്‍ എഡീഷന്‍ എത്തിയിരിക്കുന്നത്. പാര്‍ക്ക് ലൈറ്റ്, ഡുവല്‍ ഹെഡ്‌ലാമ്പ്, ടേണ്‍ ഇന്‍ഡിക്കേറ്റര്‍ എന്നീ നാല് ലൈറ്റുകള്‍ വരുന്ന സ്ക്വയര്‍ ഹെഡ്‌ലാമ്പും മുമ്പ് ക്രോമിയം ഫീനീഷിംഗില്‍ നല്കിയിരുന്ന ഗ്രില്ലിനു പകരം സ്റ്റീല്‍ ഫിനിഷിംഗ് ലോഗോ പതിപ്പിച്ച ഗ്ലോസി ബ്ലാക്ക് ഗ്രില്ലുകളുമാണ് അഡ്വഞ്ചര്‍ എഡിഷനില്‍ നല്കിയിരിക്കുന്നത്. ബമ്പറിന്റെ താഴെയായി ഡസ്റ്റര്‍ എന്ന് ആലേഖനം ചെയ്തിരിക്കുന്നതും ഇരു വശങ്ങളിലും ലൈറ്റുകള്‍ ഘടിപ്പിച്ചിരിക്കുന്നതുമായ ആര്‍മര്‍ കിറ്റ് നല്കിയിരിക്കുന്നതും എയര്‍ ഡാമിനു താഴെയായുള്ള ഭാഗങ്ങളില്‍ നല്കിയിരിക്കുന്ന ബ്രോണ്‍സ് കളര്‍ ഫിനീഷിംഗും അഡ്വഞ്ചറിന്റെ പ്രത്യേകതകളാണ്.
ബോഡി ക്ലാഡിംഗ് നല്കിയിരിക്കുന്നതില്‍ ഡസ്റ്റര്‍ അടുത്തിടെ പുറത്തിറങ്ങിയ ക്രോസ് ഓവറുകളെ മാതൃകയാക്കിയിട്ടുണ്ട്. വീല്‍ ആര്‍ച്ചിലും ബോഡിയിലും നല്കിയിട്ടുള്ള ബ്ലാക്ക് ഫിനീഷ് ക്ലാഡിംഗുകളാണ് അഡ്വഞ്ചറിനെ മറ്റു മോഡലില്‍നിന്നു വ്യത്യസ്തമാക്കുന്നത്. കൂടാതെ മഞ്ഞ നിറത്തിലുള്ള റെയില്‍റൂഫും വ്യത്യസ്തത നല്കുന്ന ഘടകമാണ്. പിന്നില്‍ ടൈപ്പ് ടുവില്‍ വരുത്തിയ മാറ്റങ്ങള്‍ തന്നെയാണ് അഡ്വഞ്ചറില്‍ എഡീഷനിലും വന്നിരിക്കുന്നത്.
4,336 എംഎം നീളവും 1,822 എംഎം വീതിയും 1,695 എംഎം ഉയരവുമുള്ള മോണോകോക്ക് ബോഡിയാണ് ഡസ്റ്ററിനുള്ളത്. 16 ഇഞ്ച് അലോയിയും 210 എംഎം ഗ്രൗണ്ട് ക്ലിയറന്‍സും ഡസ്റ്റര്‍ പ്രദാനംചെയ്യുന്നുണ്ട്.
ഇന്റീരിയര്‍: വാഹനങ്ങളെ ശ്രദ്ധിക്കുന്നവരെ അനായാസം ആകര്‍ഷിക്കാനുതകുന്ന നിരവധി പ്രത്യേകതകളാണ് അഡ്വഞ്ചര്‍ മോഡിന്റെ ഇന്റീരിയറിനുള്ളത്. ഏറ്റവും പ്രാധാന്യമര്‍ഹിക്കുന്നത് ആദ്യമായി ഡെനിം ഫിനീഷിംഗ് സീറ്റുകളാണ്. അഡ്വഞ്ചറിന്റെ ബേസ് മോഡല്‍ മുതല്‍ ഡെനിം സീറ്റ് കവറുകളാണ് വരുന്നത്. റെയില്‍ റൂഫില്‍ നല്കിയിരിക്കുന്ന നിറം ഇന്റീരിയറിലും പലയിടത്തായി കാണാന്‍ കഴിയും. എസി വെന്റുകള്‍ക്കും മീറ്ററുകള്‍ക്കും മഞ്ഞ നിറത്തിലുള്ള റിംഗ് സൗന്ദര്യം പകരുന്നുണ്ട്.
മീറ്ററിന് മഞ്ഞ നിറത്തിലുള്ള റിംഗ് നല്കിയിട്ടുണ്ടെന്നതൊഴിച്ചാല്‍ മീറ്റര്‍ കണ്‍സോളിലും സ്റ്റിയറിംഗ് വീലിലും മാറ്റം വരുത്തിയിട്ടില്ല.
കോംപാക്ട് എസ്യുവിയായതിനാല്‍തന്നെ വിശാലമായ സ്ഥലസൗകര്യമാണ് ഡസ്റ്ററിലുള്ളത്. 475 ലിറ്റര്‍ ബൂട്ട് സ്‌പേസാണ് നല്കിയിരിക്കുന്നത്.
ഇന്‍ഫോടെയ്ന്‍മെന്റ്: ഏഴ് ഇഞ്ച് ഇന്‍ഫോടെയ്ന്‍മെന്റ് സിസ്റ്റം സെന്റര്‍ കണ്‍സോളില്‍ നല്കിയിരിക്കുന്നു. മ്യൂസിക് സിസ്റ്റത്തിനു പുറമേ ജിപിഎസ് സൗകര്യവും ഇതില്‍ ഒരുക്കിയിട്ടുണ്ട്. ടോപ്പ് എന്‍ഡ് മോഡലുകളില്‍ ഓട്ടോ ക്ലൈമറ്റ് കണ്‍ട്രോളും മറ്റുള്ളവയില്‍ മാന്വലുമാണ് വരുന്നത്.
രണ്ട് െ്രെഡവിംഗ് മോഡുകള്‍: രണ്ടു മോഡലിലാണ് അഡ്വഞ്ചര്‍ എഡീഷന്‍ ഡസ്റ്റര്‍ വരുന്നത്– ടു വീല്‍ ഡ്രൈവ്, ഫോര്‍ വീല്‍ അല്ലെങ്കില്‍ ഓള്‍ വീല്‍ ഡ്രൈവ് (എഡബ്ല്യുഡി). എഡബ്ല്യുഡി മോഡലുകളുടെ ഗിയര്‍ ലിവറിന്റെ സമീപത്തായി നല്കിയിരിക്കുന്ന നോബിന്റെ സഹായത്തോടെ ടൂ വീല്‍ ഡ്രൈവിലേക്കും ഫോര്‍ വീലിലേക്കും മാറ്റാന്‍ കഴിയും.
സുരക്ഷ: അഡ്വഞ്ചര്‍ എഡീഷന്‍ റേസിംഗിന് ഏറെ പ്രാധാന്യം നല്കുന്നതിനാല്‍ തന്നെ സുരക്ഷാ സംവിധാനങ്ങളും ശക്തമാണ്. അതിന്റെ ഏറ്റവും വലിയ ഉദ്ദാഹരണമാണ് മോണോ കോക്ക് ബോഡി. ഇതിനു പുറമെ എബിഎസ്, ഇബിഡി ബ്രേക്കിംഗ് സംവിധാനത്തോടൊപ്പം സസ്‌പെന്‍ഷനില്‍ നല്കിയിരിക്കുന്ന ആന്റിറോള്‍ ബാര്‍ സംവിധാനം ഡസ്റ്ററിനു സ്‌റ്റെബിലിറ്റി ഉറപ്പു നല്കുന്നു.
എന്‍ജിന്‍: ഡീസല്‍ എന്‍ജിനില്‍ പുറത്തിറക്കുന്ന ഡസ്റ്റര്‍ അഡ്വഞ്ചര്‍ എഡീഷന്‍ 1.5 ലിറ്റര്‍ ഡിസിഐ 85പിഎസ് ടു വീല്‍ ഡ്രൈവും, 110 പിഎസ് എഡബ്ല്യുഡി എന്നീ വേരിയന്റുകളാണ് വരുന്നത്. 1461 സിസി കരുത്തില്‍ 245 എന്‍എം ടോര്‍ക്ക് 110 പിഎസും, 200 എന്‍എം ടോര്‍ക്ക് 85 പിഎസ് പവറുമാണ് ഉത്പാദിപ്പിക്കുന്നത്.
മൈലേജ്: 85 പിഎസ് മോഡലുകള്‍ക്ക് 19.87 കിലോമീറ്ററും 110 പിഎസ് മോഡലിന് 19.72 കിലോമീറ്ററുമാണ് കമ്പനി ഉറപ്പു നല്കുന്നത്.
വില: RxE, RxL, RxZ എന്നീ മൂന്നു മോഡലുകളില്‍ പുറത്തിറങ്ങുന്ന അഡ്വഞ്ചര്‍ മോഡിന്റെ കോട്ടയത്തെ ഓണ്‍ റോഡ് വില 11.17 ലക്ഷം മുതല്‍ 16.17 ലക്ഷം രൂപ വരെ.
റേസിംഗ് മുന്നില്‍ക്കണ്ട് സ്മാര്‍ട്ട് ഡ്രൈവ് ആപ്ലിക്കേഷന്‍
അഡ്വഞ്ചര്‍ എഡീഷന്റെ ഏറ്റവും വലിയ പ്രത്യേകതയായി കമ്പനി പറയുന്നത് സ്മാര്‍ട്ട് ഡ്രൈവ് ആപ്ലിക്കേഷനാണ്. ഈ ആപ്, സിസ്റ്റവുമായി കണക്ട് ചെയ്താല്‍ മീറ്ററിലെ വിവരങ്ങള്‍ ഫോണില്‍ ലഭിക്കും. റേസിംഗ് പോകുന്നവരെ ഉദേശിച്ചാണ് ഈ സൗകര്യം നല്കിയിരിക്കുന്നത്. കോ– ഡ്രൈവര്‍ ഈ ആപ്ലിക്കേഷന്‍ ഉപയോഗിച്ച് സ്പീഡ്, ലാപ് ടൈമര്‍ തുടങ്ങിയവ മനസിലാക്കാം.
ടെസ്റ്റ് ഡ്രൈവ്: റെനോ കോട്ടയം, 9061067232
